स्थानीय तहका पदहरूमा जनप्रतिनिधि चयन गर्न आज मतदान सुरु भएको छ। बिहान ७ बजेदेखि सुरु भएको यो प्रक्रिया साँझ ५ बजे सम्पन्न हुनेछ।
यस उपनिर्वाचनअन्तर्गत ४१ पदका लागि मतदान हुँदैछ। तीमध्ये नगरपालिका प्रमुख १, उपप्रमुख १, गाउँपालिका अध्यक्ष २, उपाध्यक्ष ४, र वडाध्यक्ष ३३ जना छनोट हुनेछन्। यसअघि कैलाली र ओखलढुंगाका जिल्ला समन्वय समिति प्रमुख र रुकुम पूर्वको पुथा उत्तरगंगा गाउँपालिका–२ का वडाध्यक्ष निर्विरोध निर्वाचित भइसकेका छन्।
काठमाडौंको कीर्तिपुरस्थित नवज्योति आधारभूत विद्यालय पांगा मतदान केन्द्रमा बिहान ७:१० बजेबाट मतदान सुरु भएको छ। यो केन्द्रमा १,३४० जना मतदाता रहेका छन्, मतदान अधिकृत शोभाकर खरेलले जानकारी दिए।
यस उपनिर्वाचनमा कीर्तिपुर नगरपालिकाका प्रमुख, जाजरकोटको नलगाड नगरपालिकाका उपप्रमुख, मोरङको ग्रामथान गाउँपालिका र दैलेखको महाबु गाउँपालिका अध्यक्षका साथै दोलखाको गौरीशङ्कर गाउँपालिका, हुम्लाको सर्केगाड गाउँपालिका र बाजुराको स्वामीकार्तिक खापर गाउँपालिकाका उपाध्यक्ष पदका लागि मतदान भइरहेको छ।
